سياسة الخصوصية

Rplya منصة بترتّب مراسلات نشاطك التجارى: بتجمع رسايل عملائك فى صندوق وارد واحد، ومعاها سجل عملاء مبسّط وفواتير.

القنوات الشغّالة النهارده هى واتساب وتيليجرام. إنستجرام وماسنجر لسه مش متوصّلين، ومافيش أى رسايل بتيجى منهم — والصفحة دى هتتحدّث قبل ما أى قناة جديدة تبدأ تنقل بيانات.

للتواصل بخصوص الخصوصية: info@rplya.com

يعنى إيه عملياً: رسايل عملائك وأرقامهم وأسماءهم بتاعتك إنت، وإحنا بنخزّنها ونعالجها بأمرك. إنت المسؤول عن إن يكون عندك أساس قانونى تراسلهم بيه، وإحنا المسؤولون عن إننا نأمّنها ومانستعملهاش لأى غرض غير تشغيل الخدمة ليك.

عنك إنت وفريقك

• الاسم والبريد ورقم التليفون (اختيارى)
• اسم النشاط ونوعه
• كلمة السر مخزَّنة مشفّرة باتجاه واحد — إحنا نفسنا مش قادرين نقراها
• سجل دخول وجلسات
• سجل الأحداث جوّه مساحتك: مين عمل إيه وإمتى

عن عملائك

• اسم العرض ورقم التليفون أو معرّف الحساب على القناة
• نص الرسايل والوسائط المرفقة
• وقت الإرسال وحالة التسليم
• وسوم وملاحظات إنت بتضيفها
• فواتير بتصدرها لهم

تلقائياً

• عنوان الـIP بيتسجّل وقت تسجيلك، محفوظ مع موافقتك على الشروط
• سيرفر الويب بيحتفظ بسجلات وصول عادية (عنوان الـIP ووقت الطلب) لأغراض الأمان ومنع إساءة الاستخدام

عشان نشغّل الخدمة اللى اشتركت فيها، ومافيش غرض تانى:

• نستقبل رسايل عملائك ونعرضهالك وترد عليهم
• نحتفظ بسجل العميل والفواتير
• نأمّن حسابك ونمنع إساءة الاستخدام
• نراسلك فى حاجات الحساب: تفعيل، إعادة تعيين كلمة السر، تنبيهات الاشتراك
• نحسّن الخدمة بإحصاءات مجمّعة — مش بقراية محتوى رسايلك

وفيه نقل تانٍ منفصل تماماً، وبموافقتك بس: لو فعّلت الرد بالذكاء الاصطناعى. التفاصيل فى البند اللى بعده.

كل مساحة جديدة بتبدأ والذكاء الاصطناعى مقفول. مافيش رسالة واحدة بتتبعت لأى مقدّم خدمة ذكاء اصطناعى قبل ما تفعّله إنت بنفسك من إعدادات مساحتك.

ولما تفعّله، اللى بيحصل بالظبط

• نص الرسالة الجديدة، وآخر عشر رسايل من نفس المحادثة عشان الرد يبقى مفهوم، واسم نشاطك والمعلومات اللى إنت كتبتها عنه — بتتبعت لمقدّم الخدمة
• الأحياء النهارده أكتر من مقدّم — Google Gemini وAnthropic Claude — وسيرفرات كل واحد فيهم فى الولايات المتحدة. ومساحتك بتشتغل بمقدّم واحد فى المرة، وإنت اللى بتختاره
• يعنى نقل تانى عبر الحدود، منفصل عن استضافتنا الأوروبية، وبموافقتك إنت
• بنسجّل وقت موافقتك والمقدّم اللى وافقت عليه بالذات؛ ولو المقدّم اتغيّر، الذكاء الاصطناعى بيقف لحد ما توافق من جديد. وتقدر تسحب موافقتك فى أى وقت من نفس الشاشة
• ساعة ما تسحبها، الذكاء الاصطناعى بيقف فوراً على مساحتك كلها

والمسؤولية هنا مشتركة وواضحة

إنت اللى بتقرر تفعّله، وإنت المسؤول عن إن عملاءك يعرفوا إن ردودك ممكن تكون آلية لو القانون بيطلب ده منك.

بنستعين بمقدّمى خدمة، وكل واحد بياخد أقل قدر يحتاجه:

• Meta — واتساب

  بياخد إيه

  الرسايل الداخلة والخارجة على واتساب

  فين

  حسب Meta

• Telegram

  بياخد إيه

  نفس الحاجة على تيليجرام

  فين

  حسب Telegram

• Hetzner

  بياخد إيه

  استضافة السيرفرات والنسخ الاحتياطى

  فين

  فنلندا

• Google Gemini

  بياخد إيه

  نص الرسالة والسياق — لو فعّلت الذكاء الاصطناعى واخترت المقدّم ده

  فين

  الولايات المتحدة

• Anthropic Claude

  بياخد إيه

  نص الرسالة والسياق — لو فعّلت الذكاء الاصطناعى واخترت المقدّم ده

  فين

  الولايات المتحدة

ومابنبيعش بياناتك ولا بيانات عملائك لأى حد، ومابنستعملهاش فى إعلانات.

والقنوات ليها شروطها الخاصة: لما تربط رقم واتساب، بتبقى خاضع كمان لشروط Meta، وهى فوق سيطرتنا وممكن تتغيّر من غير رجوع لينا.

• توكنات القنوات ومفاتيح المزوّدين مشفّرة فى قاعدة البيانات
• عزل بين المساحات — كل صف بيانات مربوط بمساحته، وكل استعلام بيتفلتر بيها
• الملفات والصور فى تخزين خاص، والوصول بروابط مؤقتة موقّعة مش روابط عامة
• صلاحيات داخل الفريق — تقدر تدّى كل عضو اللى يحتاجه بس
• كل الاتصالات مشفّرة عبر HTTPS

وبأمانة: مافيش نظام آمن ١٠٠٪. لو حصل اختراق يمس بياناتك أو بيانات عملائك، هنبلّغك خلال المدة المقررة فى قانون حماية البيانات الشخصية رقم ١٥١ لسنة ٢٠٢٠.

بياناتك بتفضل طول ما حسابك شغّال.

الحذف عندنا «ناعم»: لما تحذف عميل أو محادثة أو فاتورة، بتتعلّم محذوفة وبتختفى من كل الشاشات فوراً، لكن الصف نفسه بيفضل موجود فى قاعدة البيانات. ومافيش لحد دلوقتى مهمة دورية بتمحوه، ولا زرار استرجاع جوّه المنتج — الاسترجاع والمحو النهائى الاتنين بيتعملوا بطلب منك وإحنا بننفّذهم بإيدينا.

وقفل الحساب نفسه بيتم بطلب منك: ابعتلنا وإحنا بنقفل المساحة. بعدها بنمحو بياناتك لما تطلب المحو، ماعدا اللى القانون بيلزمنا نحتفظ بيه — زى السجلات المحاسبية. ومافيش مهمة تلقائية بتمحو البيانات من نفسها، فالمحو بيتم بطلبك.

النسخ الاحتياطى للقاعدة بيتخزّن على نفس سيرفراتنا فى فنلندا، وبيتحفظ 14 يوم وبعدين بيتمسح دورياً.

• تشوف بياناتك من داخل المنصة فى أى وقت
• تصدّرها: الفواتير بتتصدّر كلها CSV من السيرفر بنفس فلاتر البحث؛ والعملاء بتصدّرهم CSV بعد ما تعلّم عليهم فى القايمة، والملف ده مافيهوش الملاحظات. ومحتوى الرسايل لسه مالهوش تصدير ذاتى — اطلبه منّا
• تصحّحها بنفسك من الشاشات
• تحذفها — وبند «الاحتفاظ والحذف» فوق بيقول لك الحذف بيشتغل إزاى بالظبط
• تسحب موافقتك على الذكاء الاصطناعى

ولو عايز حاجة مش موجودة فى المنصة، ابعتلنا على info@rplya.com وهنرد عليك خلال المدة المقررة فى قانون حماية البيانات الشخصية رقم ١٥١ لسنة ٢٠٢٠.

وعميلك النهائى لو طلب منك حذف بياناته: إنت المتحكّم، وتقدر تحذفه من مساحتك وإحنا بننفّذ الحذف. لو طلب منّا إحنا مباشرةً، هنحوّله ليك، لأننا بنتصرف بأمرك.

بنستعمل الحد الأدنى: كوكى لإبقائك مسجَّل دخول، وكوكى لتفضيل اللغة.

مافيش كوكيز إعلانية ولا تتبّع لطرف تالت.

لو غيّرنا حاجة جوهرية — زى مقدّم خدمة جديد، أو غرض استخدام جديد، أو مكان تخزين جديد — هنبلّغك قبلها بـ30 يوم على الأقل.

كل نسخة من الصفحة دى ليها رقم وتاريخ مكتوبين فوق، عشان تعرف إنت وافقت على إيه.